Somos ramo, identidad colectiva en la parroquia de Bimeda
Direición: Asociación Cultural El Bail.le
Duración: 89’
Orixe: Bimeda, Cangas del Narcea, Asturias · España
Añu: 2026
Idioma orixinal: asturianu, castellanu
Producción: Benito Sierra · BSG·MEDIA
SINOPSIS
Na parroquia de Bimeda, en Cangas del Narcea, vecinos y vecines recuperen al traviés de los sos testimonios la memoria y el significáu de la ofrenda del ramu, una tradición que forma parte de la vida colectiva de la comunidá.
Somos ramo: Identidad colectiva de la parroquia de Bimeda averase a esta práctica dende les voces de les persones que la vivieron y que siguen calteniéndola, reconstruyendo los recuerdos, los vínculos y el sentimientu de pertenencia que se formen alredor d’ella.
Pero’l documental fala tamién de la fraxilidá d’esti patrimoniu. La perda de población nel mediu rural amenaza la continuidá d’una costumbre que necesita de la comunidá pa siguir viva. El ramu conviértese asina nun filu que xune memoria, territoriu y identidá colectiva, pero tamién nuna pregunta sobre quién va poder recibir y tresmitir esti patrimoniu nel futuru
DIREICIÓN
Asociación Cultural El Bail.le
La Asociación Cultural El Bail.le firma la direición de Somos ramo: Identidad colectiva de la parroquia de Bimeda, un documental construyíu alredor de la memoria y la identidá colectiva de la parroquia de Bimeda, en Cangas del Narcea. La ficha técnica recibida pola organización confirma la autoría colectiva de la direición.
El colectivu ya dirixera Aquí tamos: La voz d’un l.lugar (2025), retratu de la evolución de la parroquia de Trasmonte de Noceda. Nesi trabayu, Benito Sierra encargárase de la producción, la fotografía y la posproducción d’imaxe y soníu.
Benito Sierra González
Realizador, director de fotografía y productor audiovisual asturianu. La so trayectoria combina la creación documental col trabayu de fotografía, montaxe y posproducción cinematográfica, con especial atención al patrimoniu cultural, la memoria histórica y el territoriu.
Dirixó los documentales Huellas mineras (2023) y Memoria de los nuestros (2024), centraos na memoria de la minería de Cangas del Narcea. Tamién participó en producciones como Buñuel, un cineasta surrealista (2021), Frente al silencio (2022), El Hogar (2022) y Memoria de los olvidados (2025). Pol so trabayu de fotografía en Frente al silencio recibió un premiu nel Adolph Zukor Film Festival.
Amás, ye director de la Muestra de Cine de Puenticiella, Puenticine, y collaborador en proyectos de recuperación y divulgación del patrimoniu cultural asturianu. En Somos ramo, la so aportación audiovisual contribúi a documentar la ofrenda del ramu y la memoria colectiva de la parroquia de Bimeda..
EQUIPU TÉCNICU
Direición: Asociación Cultural El Bail.le
Idea orixinal y guión: Aida Suárez
Producción: Benito Sierra · BSG·MEDIA
Direición de fotografía: Benito Sierra
Música: Otramiente
Locución / voz en off: María Josefa Fernández Cañedo
Imaxe aérea: Leonardo Barreiro Rodríguez
Repartu: vecinos y vecines de la parroquia de Bimeda
Montaxe y posproducción d’imaxe y soníu: BSG·MEDIA
