El matancíu: vida y muerte en las tradiciones
Direición: Elia Campo
Duración: 15’
Orixe: Llanes – Asturies · España
SINOPSIS
El Matancíu: vida y muerte en las tradiciones ye un documental etnográficu que s’avera a la tradición de la matanza del gochu n’Asturies, una práctica ancestral profundamente venceyada a la vida nel mediu rural y a la memoria colectiva de les sos comunidaes.
En Llamigu, un pueblu pequeñu del valle de San Xurde, nel conceyu de Llanes, la matanza conviértese nun puntu d’alcuentru familiar y nuna oportunidá pa recuperar los recuerdos d’una forma de vida que foi tresmitiéndose de xeneración en xeneración. Al traviés d’esta costumbre, el filme explora’l significáu de la vida y la muerte dientro de les tradiciones populares, asina como los venceyos que s’establecen ente les persones, la tierra y los animales.
Carmen Rodríguez Valle, de 95 años, ye’l filu conductor d’esti percorríu pola memoria. Conocedora de la tradición dende neña, recuerda cómo se celebraba la matanza n’otros tiempos y cómo esta xuntaba a familiares y vecinos alredor d’un trabayu compartíu. Al traviés de los sos recuerdos y de la so mirada sobre’l presente, el documental recupera una forma d’entender la vida na que l’aprovechamientu de los recursos, l’ayuda mutua y los conocimientos tresmitíos de mayores a pequeños formaben parte de la vida cotidiana.
Pero El Matancíu nun se queda namás na recuperación d’una costumbre. La voz de Carmen permite observar cómo, adulces, estes práctiques van desapaeciendo y cómo, con elles, tamién se pierden formes de convivencia, saberes y esperiencies que formen parte del patrimoniu cultural asturianu.
Dende una mirada cercana y humana, el documental invita a reflexonar sobre la memoria, la familia y la continuidá de les tradiciones rurales nuna sociedá en tresformación, onde’l pasu del tiempu plantega nuevos interrogantes sobre aquello que queremos conservar y tresmitir a les xeneraciones futures..
DIREICIÓN
Elia Campo
Elia Campo ye la directora de El Matancíu: vida y muerte en las tradiciones, un documental centráu na tradición de la matanza del gochu y nel so significáu dientro de la cultura rural asturiana.
El filme recueye una práctica venceyada a la memoria colectiva y a la tresmisión de conocimientos ente xeneraciones, prestando atención al valor etnográficu de les costumes tradicionales.
EQUIPU TÉCNICU
Direición: Elia Campo
Participación: Carmen Rodríguez Valle
